Partia Socialiste po përgatitet për zgjedhjet vendore në 2027 duke forcuar skuadrën një vit para procesit zgjedhor. Pasi mblodhi Asamblenë në Durrës, kryeministri Edi Rama thirri të dielën në seli drejtuesit politik të qarqeve. Vëmendja kryesore mbetet te Tirana, ku analiza e PS se ka humbur terren u shoqërua me shtim të forcave në njësitë e kryeqytetit jo vetëm në drejtim me dyshen Ogerta Manastirliu dhe Taulant Balla. Ministra, ish ministra, deputetë e funksionarë socialistë do të intensifikojnë grupet e fushatave për zonat kryesore të Tiranës duke blinduar qytetin më të populluar në Shqipëri, me kërkesën për të thelluar rezultatin. Ministrja e Arsimit Mirela Kumbaro i është shtuar ekipit të ish ministres Lindita Nikollës dhe ministres së administratës publike Adea Pirdenit, që së bashku duhet të punojnë për njësinë numër 1. Ndërsa ish ministri i Turizmit, Blendi Klosi e çon në 4 numrin e socialistëve në njësinë 2, në grupin e ministres së ekonomisë Delina Ibrahimaj. Ministrit të ri të qeverisjes vendore Ervin Demos i ka besuar njësinë 3. Blerina Gjylameti nuk do të jetë më vetëm në njësinë 4, por caktohet edhe Eduard Shalsi. Belinda Balluku nga drejtimi politik i qarkut të Fierit do të shërbejë në njësinë 6 me Albana Koçiun që e ka zëvëndësuar në postin e zv kryeministres. Ndërsa ministri i kulturës dhe turizmit Blendi Gonxhja është lëvizur nga njësia 6 në zonën 14 të Kasharit . Arbian Mazniku i Elbasanit është caktuar të punojë me njësinë 7. Niko Peleshi është emëruar në njësinë 8, teksa në zonën 10 do jetë edhe Bledar Çuçi. Tre ish ministra do të bashkëpunojnë në njësinë 11, ku skuadra e ish ministrit të brendshëm Ervin Hoxhës dhe atij të drejtësisë Ulsi Manja, do të rritet edhe me praninë e Damian Gjiknurit. Në njësinë 13 ish ministres së bujqësisë Anila Denaj i shtohet edhe ish ministrja e jashtme Elisa Spiropali. Zgjerimi i skuadrës socialiste në kryeqytet vjen me porosinë për nisjen e punës në terren, me objektiv rritjen e numrit të votuesve rozë.