Kryeministri Edi Rama dhe Presidenti i Turqisë, Recep Tayyip Erdoğan, kanë zhvilluar një bisedë telefonike ku kanë diskutuar marrëdhëniet dypalëshe, si dhe çështjet rajonale dhe globale. Mediat turke kanë raportuar se gjatë bisedës presidenti Erdogan konfirmoi edhe një herë se marrëdhënia midis Turqisë dhe Shqipërisë është në një nivel të avancuar dhe se bashkëpunimi në industrinë e mbrojtjes do të forcohet më tej përmes kontakteve tregtare, ekonomike dhe ushtarake. Sipas asaj që raporton agjencia turke e lajmeve, Anadolu, Presidenti turk iu referua “përpjekjeve frustruese të organizatës terroriste FETO për të fituar terren në Shqipëri”, si dhe shprehu besimin se Tirana do të vazhdojë të punojë drejt eliminimit të strukturës së grupit në sektorët arsimor, shëndetësor dhe fetar. FETO dhe lideri i saj, Fetullah Gylen, akuzohen nga qeveria turke se orkestruan grushtin e shtetit të dështuar të 15 Korrikut 2016 në Turqi, në të cilin 252 persona humbën jetën dhe 2.734 të tjerë u plagosën. Në takimin e fundit mes Kryeministrit Edi Rama dhe presidentit turk Recep Tayip Erdogan në shkurt të këtij viti u dakordësua për thellimin e bashkëpunimit dhe rritjen e volumit tregtar mes dy vendeve. “Përforcuam bazën juridike të bashkëpunimit tonë. Volumi tregtar ka arritur në 1 miliardë dollarë, objektivi ynë është ta çojmë në 2 miliardë dollarë”, pat deklaruar Erdogan.