Nga Forumi Ekonomik i Delphit në Greqi, kryeministri Edi Rama kritikoi Bashkimin Europian për qëndrimin ndaj Rusisë lidhur me agresionin në Ukrainë. Në një intervistë për “Politico”, kreu i qeverisë shqiptare ia adresoi mesazhin drejtuesve më të lartë të unionit, presidentes së Komisionit Europian, Ursula von der Leyen, dhe kryediplomates së BE-së, Kaja Kallas. “Mund të them se Evropa ka bërë një gabim të madh strategjik, duke prerë çdo kanal me Rusinë. Evropa duhet të flasë gjithmonë, gjithmonë, gjithmonë me të gjithë. Evropa po e lë veten në periferi të çdo marrëveshjeje të ardhshme paqeje midis Ukrainës dhe Rusisë, duke shmangur angazhimin e drejtpërdrejtë me Moskën”. Nën udhëheqjen 13-vjeçare të Ramës, shkruan “Politico”, Shqipëria është pozicionuar si një vend i vendosur pro-BE, duke ruajtur një marrëdhënie me Shtetet e Bashkuara dhe Presidentin Donald Trump. I pyetur për mbështetjen publike që i ka dhënë presidentit Trump për luftën ndaj Iranit, kryeministri Rama nuk përjashtoi dhe ndihmën përmes bazave ushtarake, por me një kusht. “Ne do të lejonim ushtrinë amerikane të kryente operacione nga Shqipëria, me kusht që Uashingtoni të siguronte “mbrojtje ajrore, të cilën ne nuk e kemi në vend”. Teksa fokusi është te raportet me Uashingtonin, Rama nuk i shpëton edhe pyetjes për projektin e kompanisë së dhëndrit të Trump, Jared Kushner, në Ishullin e Sazanit, për të cilin ai mohon që të jetë shitur. “Është e pabesueshme që edhe kanalet e mëdha, me reputacion të lartë në mbarë botën, flasin për një ishull që iu shit Jared Kushner. Nuk është e vërtetë… Nuk e di si ta çoj deri në fund këtë, sepse nuk kemi bërë një marrëveshje me Jared Kushner. Po negociojmë një marrëveshje me Jared Kushner. Do të doja që më në fund ta kishim marrëveshjen, sepse nëse investimi i tyre do të kalojë, do të jetë një dhuratë e bukur… për t'i bërë Evropës. Por marrëveshja nuk duhet të pengojë në asnjë mënyrë përpjekjen e Shqipërisë për t'u bashkuar me Bashkimin Evropian, një proces në të cilin, së bashku me Malin e Zi, ne jemi në krye”. Duke u ndalur te procesi i integrimit, kryeministri Edi Rama shprehu sërish bindjen se Shqipëria do të finalizojë bisedimet e anëtarësimit me Bashkimin Europian deri në fund të vitit 2027 dhe do të bëhet anëtare e plotë e bllokut deri në 2030-ën.