Në profilin e tij në Facebook ku janë të përditshme postimet që promovojnë Shqipërinë turistike, kryeminsitri Rama po shpërndan edhe mesazhe sensibilizuese. Bumi i turistëve, thotë kryeministri duhet të shoqërohet edhe me shtimin e kujdesit për të mos ndotur atdheun tonë. Shembullin për të dhënë mesazhin e tij, kryeministri e merr nga Thethi. “Turizmi malor si asnjëherë më parë me bujtinat e Thethit të mbushura përplot nga turistët që vijnë prej gjithë botës për të shijuar natyrën e papërsëritshme dhe freskinë ndjellëse të këtyre ditëve fundgushti. Ama, ti që bën ecje shtigjeve atë kanaçen dhe paketën e cigares mos e hidh nëpër ferra, sepse lëndon atdheun e fëmijëve të tu, vendin e prindërve të tu, fytyrën e kësaj Shqipërie që bëhet me turp nga papastërtia e krijuar prej papërgjegjshmërisë tënde kaq të shëmtuar”, shkruan Rama në facebook. Kujtojmë që nga janari deri në fund të muajit korrik vendi ynë numëron mbi 5.2 milionë turistë të huaj.