Moti i keq ka shkaktuar përsëri probleme në segmentin rrugor Qukës - Qafplloçë. Këtë herë autoritetet kanë bllokuar qarkullimin e automjeteve përgjatë këtij aksi nacional, ndërtimi i të cilit ka kushtuar rreth 260 milionë euro. Për shkak të rënies së dherave dhe inerteve në rrugë, pezullimi i lëvizjes së automjeteve është marrë si masë për të shmangur rrezikun për përdoruesit e rrugës, pas një aksidenti të ndodhur paraditen e sotme. Policia e Qarkullimit Rrugor e Korçës dhe ajo e Elbasanit po orientojnë mjetet drejt rrugës së vjetër, duke vendosur patrulla në hyrje të Qafë Plloçës dhe në hyrje të Qukësit, për të mos lejuar hyrjen në aksin e ri. Sipas të dhënave ky aks do të qëndrojë i mbyllur deri në pastrimin e plotë të dherave dhe inerteve nga firma kontraktore, e cila ndodhet në terren dhe po kryen ndërhyrjet, ndërsa nuk dihet ende se sa do të zgjasë bllokimi i qarkullimit. Ky nuk është rasti i parë, pasi që prej inaugurimit, ky aks ka shfaqur disa herë probleme me rrëshqitjet e dherave, veçanërisht gjatë reshjeve intensive. Në muajin nëntor të vitit të kaluar një masiv shkëmbor u shkëput nga faqja e malit duke bllokuar një pjesë të segmentit dhe qarkullimi i mjeteve u mundësua përmes një bypassi ndërsa sistematikisht në këtë segment janë hasur probleme serioze.