Në Itali janë ngritur shqetësime pas raportimeve për sulme të mundshme ruse ndaj Italisë, Spanjës dhe Francës, por autoritetet italiane mohojnë të kenë marrë ndonjë paralajmërim zyrtar nga kanalet e inteligjencës, diplomacisë apo ushtrisë. Ministri i Mbrojtjes, Guido Crosetto, ka bërë thirrje për qetësi, duke theksuar se raportimet nuk kanë asnjë konfirmim zyrtar. Sipas burimeve të kualifikuara të kontaktuara nga agjencia ANSA, deri më tani nuk ka mbërritur asnjë paralajmërim tek autoritetet italiane, në asnjë nivel operacional, të inteligjencës, diplomatik apo ushtarak. “Alarmi i ngritur këtë mëngjes nga një gazetë spanjolle, e cila hipotezon sulme të mundshme nga anije dhe dronë rusë ndaj Italisë, Spanjës dhe Francës, nuk i shërben askujt dhe nuk gjen asnjë konfirmim”, deklaroi Crosetto. “Jetojmë tashmë në kohë të vështira dhe nervoze dhe nuk i duhet askujt të hedhë benzinë mbi zjarr”, shtoi ministri italian.