Parada e ditës së fitores kundër fashizmit në sheshin e kuq në Moskë këtë vit ishte tkurur nga shqetësimi I krijuar nga raketat dhe dronët e ukrainës. Në fjalën e tij ai deklaroi se ushtarët rusë në Ukrainë po luftojnë kundër një “force agresive” të mbështetur nga NATO dhe i cilësoi objektivat e luftës së tij si “të drejta” Vladimir Putin, President i Federatës Ruse: “Heroizmi i madh i brezit fitues frymëzon sot ushtarët që po zbatojnë objektivat e operacionit special ushtarak. Ata po përballen me një forcë agresive, të armatosur dhe të mbështetur nga i gjithë blloku i NATO-s. Dhe pavarësisht kësaj, heronjtë tanë ecin përpara. Por pavarësisht se sa shumë mund të ndryshojnë teknologjia dhe taktikat luftarake, një gjë mbetet e pandryshuar: janë njerëzit ata që përcaktojnë fatin e një vendi. Besoj fort në drejtësinë e kauzës sonë! Ne qëndrojmë së bashku! Fitorja ka qenë gjithmonë dhe do të jetë gjithmonë e jona! Putin e ka kthyer kujtesën e fitores sovjetike në një nga narrativat qendrore të 25 viteve të tij në pushtet, ndërsa autoritetet ruse zakonisht e shënojnë këtë paradë me madhështi dhe demonstrim force. Një seri sulmesh ukrainase me rreze të gjatë veprimi në javët e fundit e detyruan Kremlinin të shtonte masat e sigurisë dhe të tkurte festen. Për herë të parë në gati dy dekada nuk u ekspozua pajisje ushtarake dhe kishte shume pak lidere nga vendet e tjera. Si Moska ashtu edhe Kievi ranë dakord të respektonin një armëpushim treditor gjatë aktivitetit, pas një apeli të minutës së fundit nga Donald Trump. Në fjalimin e tij para paradës, ku morën pjesë njësi ushtarake ruse dhe ushtarë nga Koreja e Veriut, Putin përdori simbolikën e fitores sovjetike për të mobilizuar mbështetjen për ushtrinë ruse në Ukrainë. Pas dy përpjekjeve të dështuara për armëpushim këtë javë nga Rusia dhe Ukraina, Trump njoftoi të premten se një armëpushim treditor do të hynte në fuqi më 9 maj. “Shpresojmë që ky të jetë fillimi i fundit të një lufte shumë të gjatë, vdekjeprurëse dhe të ashpër”, shkroi Trump në rrjetin e tij Truth Social, duke shtuar se armëpushimi do të shoqërohej edhe me një shkëmbim të burgosurish. Volodymyr Zelensky nënshkroi të premten një dekret që urdhëron ushtrinë ukrainase të mos sulmojë paradën dhe konfirmoi se qeveria e tij do të respektojë armëpushimin për të mundësuar shkëmbimin e 1,000 të burgosurve nga secila palë. “Sheshi i Kuq është më pak i rëndësishëm për ne sesa jeta e të burgosurve ukrainas që mund të kthehen në shtëpi”, deklaroi Zelensky. Bisedimet e ndërmjetësuara nga SHBA për përfundimin e luftimeve kanë treguar pak progres që prej shkurtit, kur Uashingtoni zhvendosi fokusin drejt konfliktit me Iranin.