Presidenti i Rusisë, Vladimir Putin, ka deklaruar se raketa eksperimentale balistike që së fundmi u lëshua në territoret ukrainase “është dhjetë herë më e shpejt se shpejtësia e zërit” dhe mund të “udhëtojë” tre kilometra në sekondë. Mediat ruse e kanë pagëzuar armën e re me emrin “vetëtima”. Shpejtësia e zërit varet nga mjedisi, por në ajër ai qarkullon për 343 metra në sekondë apo 1235 kilometra në orë. Sipas deklarimit të Putinit, raketa mund të lëvizë 2401 metra në sekondë. Putin ka thënë të enjten se raketa që qëlloi territoret ukrainase ka rreze veprimi mesatare. BBC-ja ka bërë një analizë mbi këtë raketë, duke thënë se shpejtësia e saj ka rëndësi pasi sa më shpejt që lëviz ajo, aq më shpejt mbërrin në objektiv. Dhe, sa më shpejt që qëllon në shënjestër, aq më të vështirë ia bën ushtrisë mbrojtëse të reagojë. Një raketë balistike në përgjithësi mbërrin në shënjestër nëpërmjet një rruge harkore lart në atmosferë dhe gati njësoj zbret poshtë në destinacionin e saj. Por gjatë kohës që zbret ka më tepër energji kinetike dhe rrjedhimisht është më e shpejtë. Kjo e lejon gjithashtu të bëjë manovra drejt objektivit, duke ia vështirësuar armikut të përgjojë me sisteme të raketave tokë-ajër. Shpejtësia konsiderohet thelbësore në fushën e avionëve ajrorë. BBC-ja ka bërë me dije se mbi 12.000 raketa janë lëshuar nga Rusia kundër Ukrainës që kur nisi lufta në shkurtin e vitit 2022, ndërsa rreth 80 për qind e tyre janë detektuar nga ushtria ukrainase.