Marrin sërish kthesë negociatat për paqe në Ukrainë. Ndërsa në Uashington po planifikohet një tjetër takim mes Donald Trump dhe Volodymyr Zelenskyt, Presidenti i Rusisë, Vladimir Putin, kërcënon Kievin të pranojë planin fillestar të Shteteve të Bashkuara të Amerikës, pasi në të kundërt do t’i marrë me forcë të tjera territore. Presidenti rus tha se plani i SHBA-së për t'i dhënë fund luftës në Ukrainë mund të "formojë bazën për marrëveshjet e ardhshme", por kërcënoi se do të pushtojë më shumë territore, nëse Kievi nuk tërhiqet. Putin konfirmoi se Kremlini priste që një delegacion amerikan i kryesuar nga i Dërguari Special, Steve Witkoff, të vizitonte Moskën në fillim të javës së ardhshme, duke shtuar se Kremlini ishte gati për "diskutim serioz". Por shanset për një përparim të shpejtë duken të pakta, pasi shefi i Kremlinit përsëriti kërkesat e tij maksimaliste, duke thënë se lufta në Ukrainë do të përfundojë vetëm "kur trupat ukrainase të tërhiqen nga territoret që kanë pushtuar". "Nëse ata nuk tërhiqen, ne do ta arrijmë këtë me mjete ushtarake", tha udhëheqësi rus. Rusia po pushton rreth 20% të territorit të njohur sipas ligjit ndërkombëtar si pjesë e Ukrainës sovrane, duke përfshirë pothuajse të gjithë rajonin e Luhanskut dhe pjesë të rajoneve të Donetskut, Khersonit dhe Zaporizhzhisë. Moska po kërkon që Ukraina të dorëzojë këto katër rajone, të cilat i ka aneksuar, por jo të pushtuara plotësisht. Plani me 28 pika i SHBA pasqyronte listën e gjerë të dëshirave të Rusisë dhe përfshinte një kërkesë që Ukraina të zvogëlonte ushtrinë e saj dhe të ndalohej të bashkohej me NATO-n.