Rusia ka kërkuar nga Shtetet e Bashkuara të Amerikës ta lejojë blerjen e aeroplanëve të Boeing Co. duke përdorur para nga miliarda dollarë asetesh shtetërore të ngrira, sapo të arrihet një armëpushim në Ukrainë, sipas një burimi që është në brendësi të çështjes në Moskë. Ndërkohë që kërkesa nuk është një kusht për pranimin e një armëpushimi, Rusia kupton se fondet e ngrira nuk mund të përdoren për të blerë avionet pa qenë në vend një armëpushim, tha burimi, duke kërkuar të mos identifikohet. Një marrëveshje që lejon blerjen e avionëve mund të bëhet pjesë e një zbutjeje të sanksioneve në rast se luftimet ndalen. “Shtetet e Bashkuara nuk do të diskutojnë asnjë angazhim ekonomik deri sa të arrihet një armëpushim,” tha zëdhënësi i Këshillit të Sigurisë Kombëtare, në përgjigje të një kërkese për të komentuar nëse Rusia po kërkonte të blinte aeroplanë Boeing. Departamenti i Shtetit refuzoi të komentojë. Zëdhënësi i Kremlinit, Dmitry Peskov, nuk iu përgjigj menjëherë një kërkese për koment. Edhe Boeing refuzoi të komentojë. Ligjvënësit amerikanë kanë vlerësuar se ka rreth 5 miliardë dollarë asete ruse në SHBA. Në total, SHBA-të dhe aleatët e saj kanë ngrirë rreth 280 miliardë dollarë në rezervat e Bankës Qendrore të Rusisë, me më shumë se dy të tretat të bllokuar në Bashkimin Evropian. Rusia ka kërkuar publikisht që SHBA-të të heqin sanksionet për kompaninë ajrore kryesore të saj, Aeroflot PJSC, dhe të lejojnë rikthimin e fluturimeve direkte mes dy vendeve. SHBA-të nuk kanë komentuar publikisht këtë propozim. Boeing ka mbyllur operacionet e veta në Rusia, përfshirë një qendër inxhinierike të madhe, pas pushtimit nga Rusia të Ukrainës në shkurt 2022.