Shërbimi Federal rus i Sigurisë njoftoi të martën se po mbyllte hetimet për akuzat e rebelimit të armatosur, ndaj Yevgeny Prigozhinit, si dhe anëtarëve të grupit të tij ‘Wagner’. Në një deklaratë që u publikua nga agjencitë ruse të lajmeve, agjencia tha se personat e përfshirë në rebelim, i kishin ndërprenë aktivitetet kriminale. Rrëzimi i çështjes penale kundër grupit të mercenarëve rusë ishte pjesë e një marrëveshjeje të arritur të shtunën, e cila i dha fund rebelimit. Marrëveshja u ndërmjetësua nga presidenti i Bjellorusisë Lukashenko. Ministria ruse e Mbrojtjes bëri të ditur gjithashtu se grupi ‘Wagner’ po përgatitej t’i dorëzonte ushtrisë ruse, pajisjet e rënda ushtarake. Ndërkohë vendndodhja e kreut të grupit, Yevgeny Prigozhin vazhdon të mbetet e paqartë. Ai tha se do të shkonte në Bjellorusi, si pjesë e marrëveshjes së ndërmjetësuar nga zoti Lukashenko. Por sot gjatë një fjalimi përpara anëtarëve të ushtrisë, Presidenti i Bjellorusisë Aleksandër Lukashenko, e shmangu përmendjen e rebelimit jetëshkurtër që goditi Rusinë në fundjavë si dhe vendëndodhjen e Prigozhin. Pamjet: AFP