Presidenti i Rusisë, Vladimir Putin, shpalli një armëpushim të njëanshëm për Pashkë në Ukrainë, duke urdhëruar forcat e tij të ndalojnë luftimet nga dita e sotme në orën 18:00 sipas kohës së Moskës, deri në fund të ditës së diel. Lëvizja e Putinit vjen për të respektuar festën e Pashkëve. “Trupat tona duhet të jenë të gatshme për të zmbrapsur shkeljet e mundshme të armëpushimit dhe provokimet nga armiku dhe nga çdo veprim agresiv të tij”, thuhet në deklaratën e Kremlinit. Moska thotë se pala ukrainase duhet “të ndjekë shembullin tonë”. "Mbështetur në konsiderata humanitare ... pala ruse shpall një armëpushim për Pashkë. Urdhëroj ndalimin e të gjitha veprimeve ushtarake gjatë kësaj periudhe", i tha Putin shefit të ushtrisë, gjatë një takimi në Kremlin, duke shtuar se "Supozojmë që edhe Ukraina do të ndjekë shembullin tonë. Në të njëjtën kohë, trupat tona duhet të jenë të përgatitura të përballojnë çdo shkelje të mundshme të armëpushimit dhe provokime nga armiku, çdo veprim agresiv”. Ministria ruse e Mbrojtjes tha se kishte dhënë udhëzime për armëpushimin për të gjithë komandantët e grupeve në zonën e "operacionit special ushtarak", duke shtuar se ata do t’i përmbahen vendimin vetëm nëse ai "respektohet në mënyrë të ndërsjellë" nga Ukraina.