Ministria për Evropën dhe Punët e Jashtme ka reaguar me tone të forta pas incidentit në Pustec, ku gjatë një festivali folklorik, në prani të kryeministrit të Maqedonisë së Veriut, Hristijan Mickoski, u ekzekutua vetëm himni maqedonas dhe jo Himni Kombëtar Shqiptar. Në reagimin zyrtar, ministria e jashtme shpreh keqardhjen për ngjarjen dhe e cilëson mospërfshirjen e himnit shqiptar një mungesë serioze dhe shmangie nga rregullat e protokollit. Edhe pse aktiviteti kulturor ishte organizuar nga një shoqatë lokale, Ministria e Jashtme thekson se pjesëmarrja e kryeministrit të Maqedonisë së Veriut dhe e kryetarit të Bashkisë Pustec i jepte ceremonisë një dimension të veçantë publik dhe institucional. Në këto kushte, sipas MEPJ-së, respektimi i simboleve kombëtare të Shqipërisë duhej të ishte i padiskutueshëm.