Publikohen mesazhet e para të marra nga telefoni zyrtar i ish-këshilltarit amerikan Anthony Fauci, në kuadër të një hetimi të senatorëve republikanë mbi rolin dhe vendimmarrjen e tij gjatë pandemisë Covid-19. Në disa prej komunikimeve, Fauci diskuton mbi vaksinimin dhe rreziqet e mundshme gjatë shtatzënisë. Senatorët republikanë publikuan një pjesë të komunikimeve, pasi Departamenti Amerikan i Shëndetësisë i dorëzoi telefonin e Fauci-t një nënkomiteti të Senatit. Sipas tyre, telefoni përmbante më shumë se 34 mijë mesazhe dhe 522 mesazhe zanore, ndërsa deri tani janë bërë publike vetëm 11 mesazhe. Në një komunikim të janarit 2021, Fauci u pyet nëse kishte rreziqe potenciale për gratë shtatzëna dhe nëse vaksinimi ishte më i përshtatshëm në fillim apo në fund të shtatzënisë. Ai u përgjigj se nuk kishte “asnjë të dhënë apo arsye teorike” për të besuar se vaksinimi në fillim të shtatzënisë ishte më i mirë. Megjithatë, ai ngriti si shqetësim teorik temperaturën dhe reagimin inflamator pas dozës së dytë, duke thënë se kjo mund të lidhej me abortin spontan gjatë tremujorit të parë.