Ushtria izraelite ka informacione se kokat që drejtojnë Hamasin fshihen në Gazën jugore dhe për këtë arsye ka nisur një aksion agresiv bombardimesh në këtë pjesë, pavarësisht shqetësimeve në rritje për vdekjen e civilëve. Gjatë se hënës drejt Gazës jugore, pranë qytetit të Khan Yunis, i cili është i mbushur me palestinezë të zhvendosur brenda vendit, zbarkuan dhjetëra tanke, ndërkohë që ushtria ka shpërndarë fletëpalosje përmes së cilave iu kërkon palestinezëve të zhvendosen nga shtëpitë e tyre, siç thanë disa dëshmitarë për AFP-në. Me këtë aksion Izraeli po vë në zbatim zotimin për të shtypur Hamasin. Ndërkohë ministria e Shëndetësisë e Gazës, e drejtuar nga Hamasi, thotë se rreth 16 mijë njerëz janë vrarë në territorin palestinez, rreth 70 për qind e tyre janë gra dhe fëmijë. Sipas armëpushimit të përkohshëm që skadoi të premten, 80 pengje izraelitë u liruan, në këmbim të lirimit të 240 palestinezëve të mbajtur në burgjet izraelite. Në Gaza kanë mbetur ende 137 pengje, ndërsa Hamasi ka përjashtuar mundësinë e lirimeve të tjera derisa të arrihet një armëpushim i përhershëm. Pamjet: AFP