Spanja e Portugalia u përballën me ndërprerje masive të energjisë të hënën, duke shkaktuar kaos. Ministria e Brendshme e Spanjës ka thënë se statusi i gjendjes emergjente është aplikuar në disa rajone: Madridi, Andaluzia dhe Ekstremadura. Operatori energjetik në Spanjë, “Red Electrica”, ka thënë se ka nisur rikthimi i energjisë në disa zona në jug e veri, por ka saktësuar se është rikthyer 20 për qind e energjisë. Gjatë orëve të fundit ka pasur anulime të fluturimeve si në Spanjë ashtu edhe Portugali. Sa i përket shkaqeve, autoritetet po hetojnë tre hipoteza: një sulm kibernetik, një dështim teknik ose një fenomen i rrallë atmosferik. Sipas kompanisë portugeze të energjisë, "për shkak të ndryshimeve ekstreme të temperaturës në zona të caktuara të Spanjës, që janë shumë të nxehta gjatë verës dhe shumë të ftohta gjatë dimrit, kanë ndodhur lëkundje anormale në linjat e tensionit shumë të lartë". Këto lëkundje "mund të kenë shkaktuar dështime të sinkronizimit midis sistemeve elektrike, duke sjellë probleme në të gjithë rrjetin e ndërlidhur evropian".