Katër vite e gjysmë pas nisjes së luftës në Ukrainë, Vladimir Putin po përballet me një pyetje që nuk vjen vetëm nga Perëndimi: sa gjatë mund të vazhdojë lufta? Sipas analizës që bën e përditshmja italiane “Corriere della Sera” një sinjal i rëndësishëm erdhi nga Kirgistani, ku kryeministri indian Narendra Modi, një prej partnerëve strategjikë të Moskës, i kërkoi presidentit rus të kalojë nga një luftë pa fund drejt një zgjidhjeje. “Është koha të kalojmë nga një luftë e pafundme në një fund të luftës.”, tha Modi. India nuk është shkëputur nga Rusia. Përkundrazi, Moska mbetet një partner i rëndësishëm për Nju Delhin, veçanërisht në energji dhe mbrojtje. Pikërisht për këtë arsye, mesazhi i Modit merr peshë. Kina gjithashtu nuk ëhstë e kënaqur me situatën që zgjati kaq shumë. Një qëndrim i ngjashëm është artikuluar edhe nga Kazakistani. Presidenti Tokajev i ka shprehur Putinit pikëpyetjet e tij mbi arsyen e vazhdimit të luftës dhe natyrën e konfliktit. Këtë klimë po e shfrytëzojnë amerikanët që dërguan edhe negociatorët e tyre në Moskë. Por pyetja kryesore mbetet: pse do të negociojë Putin tani? Presidenti rus vazhdon të deklarojë se Rusia po fiton dhe se trupat e saj po përparojnë. Por shifrat në terren tregojnë një tablo më të ndërlikuar. Sipas Institutit për Studimin e Luftës, gjatë gushtit forcat ruse pushtuan ose konsoliduan rreth 90 kilometra katrorë, ndërsa forcat ukrainase rikuperuan të paktën 129 kilometra katrorë. Dhe presioni nuk vjen vetëm nga fronti. Dronët ukrainas me rreze të gjatë po godasin rafineritë, depot e karburantit, portet dhe infrastrukturën ruse, qindra kilometra larg vijës së luftimit. Pasojat kanë filluar të ndihen edhe në ekonominë ruse. Moska është detyruar të kufizojë eksportet e karburantit për të mbrojtur tregun vendas, ndërsa prodhimi i naftës në vitin 2026 parashikohet të zbresë në nivelin më të ulët që prej vitit 2009.