Partia Socialiste dhe partia demokratike kanë arritur një konsensus paraprak për draftin e përbashkët sa i përket ndryshimeve në rregulloren e kuvendit. Ato pritet të miratohen të enjten në orën 09:00 në mbledhjen e Këshillit për Rregulloren. Top Channel disponon draftin e dakorëdësuar nga dy partitë dhe rezulton se PS ka hequr dorë nga disa prej nismave të paraqitura fillimisht. Mazhoranca u tërhoq nga propozimi që projektligjet e lidhura me procesin e integrimit europian të shqyrtoheshin brenda një jave me procedurë të përshpejtuar. Gjithashtu, nuk do të ketë përgjysmim të kohës së diskutimeve në seancat plenare. Po ashtu, socialistët pranuan kërkesën e opozitës që institucionet kushtetuese të vijojnë raportimin në seancë plenare, duke mos e kufizuar këtë proces vetëm në komisione parlamentare. U rrëzua edhe ideja që të gjitha raportimet institucionale të zhvilloheshin ekskluzivisht në Komisionin e posaçëm “Për Nismat Qytetare” të drejtuar nga Xhafaj, ndërsa u dakordësua që raportimet vjetore të bëhen në komisionet përkatëse sipas fushës së përgjegjësisë. Ndërkohë, ndryshimet parashikojnë që Kryetari i Kuvendit të ketë rol më aktiv kur institucionet nuk u përgjigjen kërkesave për informacion të deputetëve. Në këto raste, ai do të kërkojë marrjen e masave disiplinore. Ndërkaq, pritet të ndryshojnë edhe rregullat për masat disiplinore ndaj deputetëve. Ato do të pezullohen në rast ankimi në Byronë e Kuvendit dhe nuk do të llogariten më me ditë pune, por me ditë kalendarike. Njëkohësisht, Sekretariati i Etikës do të ketë përfaqësim të barabartë të anëtarëve. Nëse finalizohet, marrëveshja mes PS dhe PD për rregulloren e kuvendit, do të jetë e dyta benda pak ditëve pas bashkimit të votave të opozitës me mazhorancën për rezolutën e integrimit europian.