55 ditë larg zgjedhjeve, fushata ka nisur me fjalime e akuza te forta, por në Kuvendin e sotëm fryma ishte ndryshe. Në seancën e fundit plenare para 11 majit, Partia Socialiste dhe Partia Demokratike bashkuan votat për të ngjitur krisjet e bordit të RTSH. Me dakordësinë e arritur në komisionin e medias, për 10 anëtarët e rinj të këshillit drejtues, pas shkeljeve të të mëparshmëve, marrëveshja u finalizua në Parlament me votimin e tyre. Petrit Beci, Rajmonda Bulku, Osman Mula, Bujar Kapexhiu, Robert Budina janë 5 emrat e opozitës dhe Eno Civici, Alket Braho, Lorenc Vangjeli, Pano Xhixho, Zamira Kita janë 5 emrat e mazhorancës. Votat e 74 deputetëve që hodhën pas krahëve ngjyrimet politike për një moment i besuan drejtimin e këshillit të riformatuar kandidatit Fatjon Hoxhalli, i cili ishte në garë me Helidon Halitin që u rrëzua me 57 vota kundër.