Pas deklaratës së bujshme të ministres serbe, Snezhana Paunoviç, për spastrimin etnik të Kosovës, vjen një tjetër deklaratë e fortë nga Serbia. Presidenti serb, Aleksandër Vuçiç, ka përsëritur edhe njëherë retorikën e tij nacionaliste, duke theksuar se Kosova është pjesë e Serbisë. Ai e bëri deklaratën provokuese gjatë ceremonisë së diplomimit të kadetëve të rinj të Forcave të Armatosura të Serbisë. “Kosova është pjesë e atdheut tonë, pjesë e Serbisë sonë, si sipas Kushtetutës, ashtu edhe sipas drejtësisë së Zotit. Ne duhet ta kujtojmë këtë dhe ta mbrojmë atë shenjtëri, pa prekur askënd, pa sulmuar askënd dhe pa kërcënuar askënd”, deklaroi Vuçiç, duke sulmuar hapur edhe njëherë marrëveshjen e bashkëpunimit ushtarak mes Shqipërisë, Kosovës dhe Kroacisë. Ai tha se ky pakt është kundër Serbisë. “Ata po formojnë aleanca kundër nesh në rajon. Ne i kemi kuptuar këto lëvizje dhe kemi filluar të bëjmë atë që është e nevojshme. Në një kohë kur e drejta ndërkombëtare nuk po respektohet dhe Karta e OKB-së nuk po zbatohet, ju jeni garantuesit e sigurisë dhe mbrojtjes së qytetarëve të Serbisë”, u shpreh më tej presidenti serb.