Mijëra muslimanë kanë dalë në protesta në Indi e Bangladesh të nxitur nga komente ofenduese të zyrtarëve të partisë në pushtet në Indi ndaj profetit musliman Muhamed. "Jemi mbledhur këtu për të protestuar ndaj zyrtarëve në Indi që ofenduan profetin musliman. Duam dënim me vdekje për ta”, tha protestuesi bangladeshas në Daka. Edhe në Indi mijëra njerëz protestuan për komentet ofenduese ndaj profetit musliman Muhamed të dy ish-zyrtarëve të partisë në pushtet BJP. Qeveria e kryeministrit Narendra Modi po përballet me zemëratë të gjerë nga muslimanët indianë dhe ata jashtë vendit duke përfshirë dhe nga vende të Gjirit Persik. Dy zyrtarët e partisë së tij Bharatiya Janata Party (BJP) komentonin me tallje për “jetën private të profetit musliman”. Një prej tyre, zëdhënësja Nupur Sharma, është pezulluar ndersa një tjetër është përjashtuar nga partia, sipas raportimeve. Muslimanët e vendit e konsiderojnë lëvizjen përçarëse si presion të nacionalistëve Hindu të BJP, për cështje si liria e besimit apo mbajtja e shamive të kokës së grave muslimane. Në qytetin Prayagraj të rajonit Uttar Pradesh policia me veshje të rënda goditi sot protestuesit e lëshoi gaz lotsjellës ndaj turmave që protestonin në rrugët e mbushura me gurë e tulla.