Në ditën e 25 të protestës, qytetarët kërkuan të dalin me një qëndrim të vetëm: dorëheqjen e kryeministrit Edi Rama. Protesta që nisi kundër investimit 4 miliardë euro në Zvërnec dhe u zgjerua me pesë kërkesa, nga qeveria tranzitore te ndryshimet në Kushtetutë, duket se po kthehet në një përballje vetëm me kryeministrin. Në shesh u hodh edhe ideja për përshkallëzim të protestës. As Sali Berisha nuk i shpëtoi sulmit të protestuesve. Surpriza e protestës së 25 ishte shiu, që qytetarët e sfiduan me këngë e çadra në bulevardin “Dëshmorët e Kombit”. Me thirrjet për qytetarët që të bashkohen në shesh, protestuesit marshuan sërish në rrugët kryesore të kryeqytetit. Pas një ndalese të shkurtër pranë Gjykatës së Lartë, qytetarët u rikthyen te bulevardi “Dëshmorët e Kombit” me thirrjen e njëjtë për dorëheqjen e klasës politike dhe mesazhin se do të vazhdojnë protestat.