Protesta e njëmbëdhjetë e qytetarëve në Tiranë, por e para kombëtare, kishte të njëjtën kërkesë: krijimin e qeverisë tranzitore. Edhe në ditën e 11, takimi i qytetarëve nisi te sheshi “Skënderbej”, me një mesazh për të gjithë politikën. Më pas, qytetarët marshuan drejt Kryeministrisë, ku nuk munguan dhe tensionet. Përfaqësues të Forumit Rinor të Partisë Demokratike u panë mes protestuesve, por këta të fundit kërkuan largimin e tyre. Protestuesit kërkuan sërish dorëheqjen e kryeministrit Rama dhe propozuan formimin e Kuvendit Kombëtar. Protesta kombëtare në Tiranë mblodhi qytetarë të shumtë brenda dhe jashtë vendit, të cilët pas 3 orësh qëndrimi para godinës qeveritare, marshuan në rrugët kryesore të kryeqytetit me brohoritje dhe flamuj kuqezi. Protesta kombëtare e 10 qershorit përkoi me 148-vjetorin e Lidhjes së Prizrenit e me qëllimin e kombit të bashkuar.