Presidenti amerikan, Donald Trump nisi një sulm të ri ndaj guvernatorit të Kalifornisë dhe kryetarit të bashkisë së Los Angelesit në një postim të ri në Truth Social, ndërsa njëkohësisht lavdëroi veten dhe administratën e tij për vendimin për të dërguar Gardën Kombëtare, me qëllim shpërndarjen e protestuesve. “Ne morëm një vendim të shkëlqyer për të dërguar Gardën Kombëtare për t’u marrë me trazirat e dhunshme dhe të nxitura në Kaliforni. Nëse nuk do ta kishim bërë këtë, Los Anxhelosi do të ishte shkatërruar plotësisht”, tha fillimisht Trump përpara se të niste sulmin e tij ndaj Newsom dhe Bass. “‘Guvernatori’ Gavin Newsom dhe ‘Kryetarja’ Karen Bass, krejtësisht të paaftë, duhet të thoshin: ‘FALEMINDERIT, PRESIDENT TRUMP, JE I SHKËLQYER. PA JU NE JEMI ASGJË, ZOTËRI.” Në vend të kësaj, ata zgjodhën t’i gënjenin njerëzit e Kalifornisë dhe Amerikës, duke thënë se ne nuk ishim të nevojshëm dhe se këto ishin ‘protesta paqësore’”, shkruan Trump ndër të tjera. Guvernatori i Kalifornisë, Gavin Newsom ka njoftuar se Kalifornia do të padisë administratën Trump të hënën për vendosjen e Gardës Kombëtare për të shuar protestat e Los Angelesit kundër bastisjeve federale të imigracionit. Ai i ka thënë se padia do të sfidonte federalizimin e Gardës Kombëtare të Kalifornisë nga Trumpi pa pëlqimin e shtetit, një veprim me pak precedent në historinë e vendit, raporton The Guardian. I pyetur për më shumë detaje mbi padinë, Newsom ka thënë se sipas urdhrit ekzekutiv të Trumpi, "ai vëren se ata duhej të koordinoheshin me guvernatorin e shtetit. “Ata kurrë nuk u koordinuan me guvernatorin e shtetit", ka thënë Newsom. Trumpi ka dhënë urdhër të dielën për vendosjen e Gardës Kombëtare në rrugët e Los Angelesit për të shuar protestat kundër bastisjeve ndaj emigrantëve, ndërsa Neësom e ka quajtur vendimin “të paligjshëm”. Ministri i Jashtëm i Meksikës, te ka deklaruar të hënën se të paktën 42 meksikanë, 37 burra dhe pesë gra, po mbahen në katër qendra paraburgimi pas bastisjeve të fundit të imigracionit që u zhvilluan në Los Angeles.