Kryeministri Edi Rama në një tjetër reagim në rrjet thotë se protestuesit e ardhur nga Kosova dhe Maqedonia e Veriut në Tiranë nuk përfaqësojnë diasporën. Në një koment nisur nga një postim i ish deputeteje të Shkupit, Arta Toci, e cila kritikonte praninë e shqiptarëve të Maqedonisë së Veriut në protestat në Tiranë, Rama thotë se ata kanë shtetin e tyre dhe se nuk mund të vijnë në kryeqytetin shqiptar si diasporë. “Brengoset apo gëzohet kush i do shqiptarët në sherr e në rrëmujë, kur e sheh këtë “diasporë” të Maqedonisë së Veriut dhe Kosovës të turret si një hordhi pushtuese mbi kuaj me katër rrota drejt Tiranës, për të rrëzuar qeverinë e Shqipërisë? Kjo është një pyetje që në fakt duhet t’ia bëjnë vetes sponsorët e tyre, të cilët i siguroj se po i harxhojnë paratë vetëm e vetëm për t’i bërë dëm kombëtar e ndërkombëtar imazhit të shqiptarëve të Maqedonisë së Veriut dhe vetë Kosovës. Sepse sa për mua dhe qeverinë e Partisë Socialiste duhet të vazhdojnë të paguajnë naftë, ushqim e qeleshe, deri ditën kur mbaron kontrata jonë e pazgjidhshme me 856.177 shqiptarë, brenda e jashtë atdheut. Maj 2029”, shkruan Rama.