Protestat pro-palestineze kanë prekur në mënyrë spirale të gjitha universitetet në Shtetet e Bashkuara, përfshi Universitetin e Kalifornisë së Jugut dhe Teksasin, ku pati edhe përplasje mes studentëve dhe policisë. Madje Universiteti i Kalifornisë së Jugut se ka anuluar ceremoninë kryesore të diplomimit këtë vit, për shkak të masave të sigurisë si pasojë e protestave kundër luftës në Gazë mes Izraelit dhe Hamasit. “Ne nuk do të jemi në gjendje ta organizojmë ceremoninë kryesore që tradicionalisht bën bashkë 65.000 studentë, familje dhe miq në kampusin tonë në të njëjtën kohë”, tha universiteti. E veçanta e këtyre protestave janë kampet me tenda të ngritura brenda kampuseve universitare si në universitetet e Uashingtonit dhe Neë Yorkut, Harvardit dhe Miciganit. Më shumë se 200 protestues që shprehën zemërimin kundër numrit gjithnjë e në rritje të viktimave në Gaza u arrestuan në universitetet në Los Angeles, Boston, Austin, Teksas. Ndërkohë që policët në shtetin jugor të Xhorxhias përdorën gaz lotsjellës dhe solucione të tjera kimike për të shpërndarë protestuesit. Sekretari amerikan i Shtetit, Antony Blinken, në një koment të fundit për protestat nuk shprehet kundër tyre. Ai thotë se protestat janë pjesë e demokracisë, por kritikoi "heshtjen" ndaj dënimit të militantëve palestinezë të Hamasit. Këto deklarata Blinken i bëri nga Pekini, ku po zhvillon një vizitë zyrtare. "Është shenjë dalluese e demokracisë sonë që qytetarët tanë të bëjnë të njohura pikëpamjet e tyre, shqetësimet e tyre, zemërimin e tyre në çdo kohë. Dhe mendoj se kjo pasqyron forcën e vendit, forcën e demokracisë. Lufta mund të kishte mbaruar muaj më parë, nëse Hamasi do të kishte liruar pengjet izraelite”, tha Blinken. Të gjendur përballë valës gjithnjë e në rritje të protestave, universiteti i Kolumbias u tërhoq nga një afati i vendosur për studentët pro-palestinezë, për të braktisur tendat e ngritura brenda kampuseve ku protestojnë. Pamjet: AFP