Vazhdojnë protestat në universitetet amerikane për luftën në Gaza. Policia hyri në kampusin e Universitetin të Kalifornisë dhe sipas CNN, qëlloi me plumba gome ndaj protestuesve. Një situatë e ngjashme u regjistrua në Universitetin e Arizonës, gjatë demonstratave të grupeve pro-palestineze dhe atyre pro-izraelite. “Ata nuk kishin zgjidhje tjetër veçse të ndërmerrnin veprime konkrete përballë veprimeve të rrezikshme të qindra protestuesve”, tha presidenti i Universitetit të Arizonës, Robert Robbins. Dhjetëra arrestime pati edhe në protestat e tjera nga Teksasi në Neë Hampshire dhe Kaliforni, ku u raportuan edhe disa të plagosur. Ndërkaq, presidenti Joe Biden deklaroi se "Në Shba mbrohen protestat paqësore, por jo ato të dhunshme". Ai e tha këtë kur theu heshtjen për protestat pro Gazës në kampuset amerikane. “E drejta për të protestuar nuk do të thotë e drejtë për kaos”, nënvizoi presidenti, duke kujtuar se “antisemitizmi nuk ka vend në universitetet amerikane”. Gjithsesi presidenti i SHBA u deklarua kundër ndërhyrjes së gardës kombëtare në kampuse, duke shprehur besimin se situata do të ndryshojë gjatë ditëve të ardhshme.