Pas protestave të nisura në Serbi nga opozita për anulimin e procesit zgjedhor, Departamenti amerikan I shtetit I kërkoi autoriteteve serbe që të shqyrtojnë pretendimet për parregullsi me OSBE-në. Legjitimiteti zgjedhor, sipas DASH, varet nga transparenca dhe gatishmëria e aktorëve politik për të njohur rezultatin zgjedhor. “Mbetemi të angazhuar për të bashkëpunuar me Serbinë për forcimin e demokracisë dhe rendit e ligjit, avancimin e bashkëpunimit rajonal, rritjen e vazhdueshme ekonomike dhe përshpejtimin e përparimit të Serbisë në rrugën drejt anëtarësimit në Bashkimin Evropian. E ardhmja e Serbisë është me Perëndimin,”, tha departamenti amerikan I shtetit për Zërin e Amerikës në një përgjigje të dhënë me shkrim për protestat në Beograd. Portestat të cilat po vijojnë prej afro tetë ditësh nisën pas thirrjeve të grupi opozitar “Serbia kundër dhunës”, se zgjedhjet u manipuluan nga partia fituese e presidentit Aleksandër Vuçiç. Deri më tani policia ka arrestuar rreth 38 persona që morën pjesë në tubimin e të dielës ku u sulmua Kuvendi. Ndërkohë disa nga politikanët e opozitës kanë filluar një grevë urie. Protesta pati dhe këtë të hënë ku grupe studentësh bllokuan disa rrugë në Beograd duke kërkuar hapjen e listave të votuesve në kryeqytet. Ata paralajmëruan bllokim të mëtejmë rrugësh nëse nuk plotësohen kërkesat e tyre.