Kryeministri izraelit Benjamin Netanyahu njoftoi të hënën shtyrjen e kalimit të reformës gjyqësore në parlament pas disa muajsh protesta që nxorën në rrugë dhjetëra mijëra njerëz. Në një fjalim përpara kombit ai tha se “Për shkak të ndjenjës së përgjegjësisë kombëtare, nga vullneti për të parandaluar një përçarje mes popullit tonë, kam vendosur të ndaloj leximin e dytë dhe të tretë të projektligjit. Ai shtoi se do të shtyjë shqyrtimin e projektligjit për seancën e ardhshme të parlamentit që fillon në gjysmën e dytë të prillit. Presidenti izraelit Isaac Herzog më herët gjatë të hënës kishte bërë thirrje për një ndalim të menjëhershëm të procesit legjislativ, një ditë pasi Netanyahu shkarkoi ministrin e tij të mbrojtjes Yoav Gallant, sepse kishte kërkuar të njëjtën gjë. Kjo shkaktoi një thirrje për grevë të përgjithshme të hënën nga shefi i lartë i sindikatave të Izraelit, Arnon Bar-David, por ai e anuloi aksionin pas fjalimit të Netanyahut. "Pas njoftimit të kryeministrit, unë shpall përfundimin e grevës," tha në një deklaratë Bar-David, kryetar i konfederatës së sindikatave Histadrut. Fluturimet u ndërprenë, spitalet ndaluan shërbimin jourgjent, madje edhe diplomatët kishin lënë punën të hënën. Pamjet: AFP