Për herë të parë, në ditën e 30, protesta ndryshoi skenar. Një banderolë e studentëve nga dritaret e Universitetit të Politeknikut zhvendosi vëmendjen e protestës nga Kryeministria, por edhe një pjesë të qytetarëve. Një numër i madh qytetarësh ju bashkuan studentëve te Politekniku, pasi rojet private të godinës ndërhynë dhe iu hoqën banderolën. Shkallët e universitetit u mbushën me protestues, ku pas përplasjes me rojet e sigurisë, arritën të rimerrnin banderolën. E ndërsa te Politekniku protestuesit përplaseshin me rojet e sigurisë, ku thyen dhe dyer e xhama të institucionit, në podiumin para Kryeministrisë u ngjitën disa eurodeputetë nga Grupi i Gjelbër, me kërkesën e të cilëve pak javë më parë u shtua në raportin për Shqipërinë edhe amendamenti 17, ku i kërkohej qeverisë shqiptare memorandum për ndërtimet në zonat e mbrojtura, dhe që u miratua me shumicë votash në Parlamentin Evropian. Eurodeputetja holandeze, Tineke Strik, dhe ajo gjermane, Jutta Paulus, dhanë mesazhe në mbështetje të protestuesve.