Autoritetet në Pakistan raportuan se kanë arrestuar rreth 1,000 mbështetës të ish-kryeministrit të burgosur Imran Khan që kishin ardhur në masë në kryeqytetin Islamabad, për të kërkuar lirimin e tij. Përfaqësues të Khan thanë për mediat pa dhënë prova konkrete, se qindra njerëz kanë pësuar plagë armësh zjarri gjatë përleshjeve të natës në kryeqytet, teksa protestuesit e drejtuar nga bashkëshortja e Khan kalonin me forcë mes barrikadave të policisë. Kreu i policisë së Islamabad, mohonte se oficerët kishin përdorur armët e zjarrit gjatë operacionit, ku policia asistohej dhe nga forcat ushtarake e paraushtarake. Ai tha se 600 protestues ishin arrestuar gjatë operacioneve të së martës, duke e çuar numrin total të të ndaluarve prej të dielës në 954. Ndërkohë dhjetëra armë janë sekuestruar. Të paktën pesë persona janë vrarë gjatë përplasjeve të shumta, mes të cilëve dhe anëtarë të forcave të sigurisë, raportojnë mediat vendase, teksa mbështetësit e Khan thonin se nuk largohen nga kryeqyteti deri në lirimin e liderit. Mijëra njerëz refuzuan bllokimet e vendosura nga policia, shumica mbështetës të partisë së Khan, që kërkojnë lirimin e tij para seancës gjyqësore për akuza terrorizmi.