Dhoma e Përfaqësuesve e SHBA miratoi një projektligj që mund të çojë në ndalimin e platformës TikTok, e krijuar nga një kompani kineze. Por ky projektligj nuk u prit pozitivisht nga të gjithë, teksa disa persona protestuan jashtë Shtëpisë së Bardhë. Me pankarta në duar që shkruanin se “TikTok na ka ndihmuar që të rrisim biznesin tonë”, ose “Na ka ndryshuar jetën”, ata shprehwn kundërshtinë për këtë projektligj. Ndërkohë Ministria e Jashtme e Kinës publikoi një sërë deklaratash në X, të cilat duket se janë një përgjigje ndaj votimit të Dhomës së Përfaqësuesve të SHBA. “Kina nuk abuzon kurrë me kufizimet ndaj ndonjë vendi apo biznesi të caktuar. Kompanitë e huaja janë të mirëseardhura në tregun kinez me produktet dhe shërbimet e tyre, për sa kohë që respektojnë ligjet dhe dispozitat kineze”, thuhet në reagimin e Ministrisë. Kjo pasohet nga një postim ku thuhet: Kushdo që të bëhet president i SHBA-së, shpresojmë që SHBA-të të ndjekin parimet e respektit të ndërsjellë, të bashkëjetesës paqësore dhe të bashkëpunimit të favorshëm dhe të punojnë me Kinën në të njëjtin drejtim për rritjen e qëndrueshme, të shëndoshë dhe të qëndrueshme të marrëdhënieve Kinë-SHBA. Pekini ka kritikuar prej kohësh përpjekjet për të shtypur kompanitë kineze në SHBA nën sugjerimet se ato janë një kërcënim për sigurinë kombëtare, duke i quajtur lëvizje të tilla “konkurrencë të pandershme në treg”. Pamjet: AFP