Kjo e martë solli tension para Bashkisë së Durrësit, ku banorë të qendrës historike të qytetit dolën sërish në protestë kundër projektit për Transformimin e Integruar të Durrësit (TID). Sipas tyre, projekti që fillimisht parashikohej si restaurues, është shndërruar në një plan që parashikon prishjen e banesave dhe bizneseve të tyre. Banorët kërkuan ndërhyrjen e Këshillit Bashkiak, duke theksuar se 74 familje ndodhen në një situatë kritike. “Ju na flisni për konsultime në 2021-2022, ndërsa ndryshimi i fundit të projektit është bërë në 2024, një muaj para aprovimit në KKT. Ne nuk vejmë në dyshim projektin, po procedurat dhe ndryshimet që çuan deri në prishje. Konsultim në 2021 dhe shpronësim në 2025?! Jemi shumë larg në kohë. Ky projekt ka degraduar…” shprehet Entela Koja, banore. “Shtëpi që nuk kanë lidhje me zbulimin e Amfiteatrit, po thjesht me grabitjen e pronës”, thotë një tjetër banor. Tensione pati dhe në mbledhjen e Këshillit Bashkiak, ku diskutimi mbi projektin TID shkaktoi debate. Këshilltarët e opozitës dolën në krah të banorëve dhe kërkuan nga Bashkia informacion mbi procedurat dhe tjetërsimin e projektit, si dhe shpronësimet që nuk përputhen me vlerat reale të tregut. Sipas Bashkisë, projekti është hartuar prej katër vitesh dhe banorët janë informuar përmes dëgjesave publike të bëra në vitet 2021-2022, ndërsa projekti është formalizuar me vendim të Këshillit të Ministrave dhe financohet nga Fondacioni Shqiptaro-Amerikan për Zhvillim (AADF) E pranishme në mbledhje, përfaqësuesja e banorëve të prekur nga projekti që synon transformimin urban të zonës historike të qytetit u shpreh se nuk morën përgjigje për pyetjet e ngritura, ndërsa këshilltarë të opozitës deklaruan se do të qëndrojnë në krah të tyre. “Si arrin një ent i huaj të bëjë një plan vendor të detajuar, pa dijeninë tuaj?”, shton banorja Entela Koja. “Nga një projekt restaurues për rijetësimin e zonës historike të Durrësit, në një projekt shkatërrues që shemb shtëpitë e durrsakëve dhe merr pronat e tyre pa asnjë marrëveshje me ta. Kjo është zemra e Durrësit të vjetër. Ne kurrë nuk do të heshtim.”, u shpreh Eda Harizi, Këshilltare Bashkiake. Protesta vijoi edhe pas mbledhjes, ndërsa banorët shprehen të vendosur të mos tërhiqen nga kërkesa për një zgjidhje të drejtë.