Gjashtë ditë pasi Elia Zaharia dhe Princi Leka i Dytë Zogu paditën njëri-tjetrin për dhunë, ndërsa në media u publikua një video e përplasjes mes tyre, gjykata i ka pajisur të dy me urdhër mbrojtje. Në dokumentin e plotë të gjykatës të siguruar nga Top Channel, theksohet që Princi mund t’i afrohet Pallatit Mbretëror, vetëm në rastet kur do të takojë vajzën e mitur. Në urdhrin e mbrojtjes për Elia Zaharinë gjykata e urdhëron të paditurin Princ Leka 2 të mos i afrohet ish-bashkëshortes në proces divorci, njëherësh paditëses Elia Zogu, përtej një distance prej 5 metrash. Po ashtu Princ Leka Zogu urdhërohet të mos qëndrojë në Rezidencën Mbretërore ku jeton paditësja Elia Zogu, me përjashtim të rasteve kur ka oraret e takimit me vajzën e tij të mitur, Geraldina. I padituri Leka II Zogu ka të drejtë të takojë dhe të qëndrojë me fëmijën e mitur nga dita e hënë deri të premten, nga ora 16:00 deri në orën 18:00 dhe ditën e shtunë dhe të diel nga ora 11:00 deri në orën 13:00. Gjykata specifikon se marrja dhe dorëzimi i fëmijës do të realizohet në prezencën e dados. Ndërkohë në urdhrin e menjëhershëm të mbrojtjes që është lëshuar për Princ Lekën, e paditura Elia Zogu urdhërohet të mos e cenojë dhe kërcënojë paditësin. Ish-bashkëshortja aktore e prncit urdhërohet gjithashtu të mos i afrohet atij, banesës ku jeton paditësi Leka II Zogu, vendit të tij të punës apo vendeve të tjera që frekuenton, përtej një distance 5 metër. Po ashtu Elia nuk lejohet të qëndrojë në rezidencën Mbretërore gjatë orareve që Princi duhet të zhvillojë takimet me të bijën. Në vendimin e gjykatës specifikohet gjithashtu se deri në marrjen e një vendimi për vërtetimin e urdhrit të menjëhershëm të mbrojtjes, Elia Zaharia do të jetojë në Rezidencën Mbretërore.