Udhëheqësi mercenar rus, Jevgeni Prigozhin komentoi për herë të parë publikisht këtë të hënë rebelimin e grupimit të tij Vagner. Në një mesazh audio prej 11 minutash, të publikuar në rrjetin Telegram, Jevgeni Prigozhin tha se nuk kishte për qëllim të përmbyste qeverinë e Putin, por të protestonte ndaj mënyrës si është zhvilluar lufta në Ukrainë “Qëllimi ynë ishte të mbanim përgjegjës ata që bënë gabime gjatë operacionit ushtarak speciak. Marshimi kishte për qëllim të shmangte shkatërrimin e grupit Vagner. Ne u kthyem mbrapsht për të shmangur gjakderdhjen e ushtarëve rusë dhe treguam përsosmëri se si duhet të ishte 24 shkurti i vitit 2022” Zhvillimet e fundit kanë ngritur pikëpyetje rreth ndikimit të tyre tek lufta në Ukrainë e madje tek e ardhmja politike e Presidentit Vladimir Putin. Përplasjet mes udhëheqësit të grupit ‘Wagner’, Jevgeny Prigozhin dhe ushtrisë ruse, të cilat janë acaruar gjatë gjithë luftës, shpërthyen në një revoltë që çoi në marshimin e tyre drejt Moskës. Ata arritën të marrin kontroll komandën e ushtrisë ruse për luftën në Ukrainë në qytetin Rostov-mbi-Don. Por pas më pak se 24 orë nga fillimi i rebelimit, trupat e grupit ‘Wagner’ u ndalën. Kremlini njoftoi se kishte arritur një marrëveshje që zoti Prigozhin të largohej në Bjellorusi, dhe se ai dhe trupa e tij nuk do të ndiqeshin penalisht. Por të hënën mediat ruse njoftuan se hetimi penal kundër tij vazhdon dhe se vendndodhja e udhëheqësit të grupit ‘Wagner’ nuk dihet. Mbetet e paqartë se çfarë do të ndodhë me zotin Prigozhin dhe forcat e tij bazuar në marrëveshjen e ndërmjetësuar nga Presidenti bjellorus Alexander Lukashenko. Pamjet: AFP