Presidenti i Shteteve të Bashkuara, Donald Trump, mbajti një qëndrim të ashpër ndaj Izraelit dhe Iranit, duke i akuzuar të dyja palët për shkelje të armëpushimit. Kritikat e tij sollën efekt të menjëhershëm në terren, me një ulje të tensioneve dhe një ndalim të përkohshëm të luftimeve. Pas deklaratave të Trumpit, Izraeli njoftoi goditjen e një radari iranian, por më pas u përmbajt nga sulme të mëtejshme. Ky vendim erdhi pas një telefonate mes kryeministrit izraelit, Benjamin Netanyahu, dhe presidentit amerikan. Në një adresim drejtuar qytetarëve, Netanyahu e cilësoi fitoren si historike: “Ne eliminuam dy kërcënime të menjëhershme ekzistenciale, një kërcënim bërthamor dhe një kërcënim me raketa balistike. Nëse nuk do të kishim vepruar, do të përballeshim me rrezikun e asgjësimit.”, deklaroi ai. Netanyahu konfirmoi se Forca Izraelite e Mbrojtjes ka eliminuar komandën e lartë iraniane, përfshirë tre shefa shtabi dhe shkencëtarë bërthamorë. Kufizimet për qytetarët izraelitë janë hequr, dhe disa aeroporte janë rikthyer në funksion. Nga ana tjetër, presidenti i ri i Iranit, Masoud Pezeshkian, ka deklaruar se Teherani do ta respektojë armëpushimin, por vetëm nëse Izraeli nuk e shkel atë. Por përkundër përkushtimit të përkohshëm ndaj armëpushimit, Irani ka bërë të qartë se nuk do të tërhiqet nga puna për zhvillimin e armëve bërthamore dhe pasurimin e uraniumit. Armëpushimi u reflektua menjëherë edhe te çmimet e naftës në tregjet ndërkombëtare, të cilat pësuan një rënie të ndjeshme. Sipas agjencive të lajmeve ndërkombëtare, një fuçi nafte e papërpunuar amerikane ka rënë me 4.9%, duke arritur në 65.12 dollarë, ndërsa nafta Brent, e cila shërben si standard ndërkombëtar për çmimin e naftës, ka rënë me 4.8%, në 67.13 dollarë. Rënia e çmimeve gjatë dy ditëve të fundit i ka çuar ato nën nivelet që regjistroheshin përpara se Izraeli të kryente një sulm ndaj Iranit, gati dy javë më parë. Ky zhvillim shihet si një tregues se tregjet janë duke vlerësuar mundësinë e stabilizimit të situatës në rajon.