Presidenti amerikan, Donald Trump, ka propozuar që Ngushtica e Hormuzit të riemërtohet “Ngushtica e Trumpit”, në një kohë kur kjo rrugë ujore strategjike mbetet në qendër të tensioneve për shkak të konfliktit me Iranin. “Tani që e kemi nën kontrollin e SHBA-së, a duhet ta ndryshojmë emrin e Ngushticës së Hormuzit në Ngushtica e Trump?”, shkroi presidenti në një postim në truth social, duke shtuar se “ashtu si Amerika, ngushtica do të ishte ‘më e nxehtë se kurrë më parë’”. Ngushtica e Hormuzit mbetet një nga rrugët detare më të rëndësishme strategjike në botë, veçanërisht për transportin e naftës dhe gazit. Në javët e fundit, SHBA-ja ka deklaruar se ka marrë kontrollin e rrugës ujore, ndërsa konflikti me Iranin ka sjellë përplasje dhe tensione të vazhdueshme në zonë. Deklarata e presidentit Trump vjen në një kohë tensionesh në rritje mes Uashingtonit dhe Teheranit, ku gjatë orëve të fundit, të dyja palët kanë shkëmbyer sulme me raketa e dronë, me shënjestër kryesore Ngushticën e Hormuzit. Ushtria amerikane goditi objektivat e Gardës Revolucionare Iraniane. Gjysmëhëna e Kuqe Iraniane tha se pesë persona, përfshirë një fëmijë, u vranë dhe më shumë se 50 u plagosën kur një sulm me raketa amerikane goditi një shtëpi ku po zhvillohej një ceremoni dasme në Iranin jugor. Teherani u kundërpërgjigj me sulme me raketa e dronë mbi objektivat amerikane në Jordani, Kuvajt, Irak dhe Bahrein. Garda revolucionare e akuzoi SHBA-në për krime lufte dhe tha do të "pendohet" për sulmet.