Për herë të parë një President i Republikës së Shqipërisë zhvilloi një vizitë zyrtare në Emiratet e Bashkuara Arabe. Bajram Begaj u prit në Abu Dhabi nga Presidenti Sheikh Mohamed bin Zayed Al Nahyan, me fokus te forcimi i marrëdhënieve mes dy vendeve. Në takimin mes dy presidentëve u diskutua për zgjerimin e bashkëpunimit ekonomik dhe rritjen e investimeve nga Emiratet në Shqipëri. Infrastruktura, energjia, inovacioni dhe turizmi u veçuan si disa nga fushat ku shihet potencial për projekte të reja. Begaj vlerësoi mbështetjen e Emirateve të Bashkuara Arabe ndaj Shqipërisë në momente të vështira, duke përmendur luftën në Kosovë, tërmetin e vitit 2019 dhe sulmin kibernetik të vitit 2022. Sipas Presidencës, marrëdhëniet mes dy vendeve pritet të marrin një tjetër shtysë edhe me hapjen e Ambasadës së Emirateve të Bashkuara Arabe në Tiranë. Pjesë e diskutimeve ishin edhe zhvillimet ndërkombëtare dhe bashkëpunimi në arenën shumëpalëshe, me theks te paqja, siguria dhe zhvillimi.