Vizitën e tij dyditore në Mal të Zi, Presidenti Bajram Begaj e nisi nga dy komunat shqiptare, Tuz dhe Plavë- Guci. Në sheshin ku ngrihet monumenti i heroit kombëtar, Gjergj Kastriotit Skëndërbeu në Tuz, ansambli Besa e priti presidentin shqiptar me “Vallen e Mejdanit”. Më tej, kreu i shtetit zhvilloi takime me drejtues të Tuzit dhe përfaqësues politikë të shqiptarëve në institucione, me të cilët diskutoi për forcimin e pozitave të shqiptarëve në Mal të Zi dhe rajon, si dhe angazhimin e përbashkët për të mirën e tyre dhe rëndësinë e realizimit të projekteve të përbashkëta mes Shqipërisë, Kosovës e Malit të Zi. “Çështja kombëtare, duhet të dominojë mbi çdo interes politik, për faktin se është më e rëndësishme dhe gjithashtu duhet të punojmë fort të mbrojmë gjuhën shqipe”. “Interesi ynë i përbashkët është që të mbrojmë ADN- në tonë dhe ADN-ja jonë është e lidhur me gjuhën” Si President i Republikës së Shqipërisë, Begaj premtoi se do të jetë në dispozicion të shqiptarëve të Malit të Zi në shërbim të interesave madhore kombëtare.