Ndryshe nga kryesocialist Edi Rama, që adresoi kërkesa specifike për kandidatët e tij, për kreun e opozitës, Sali Berisha, parësor për të gjithë emrat në listë është programi i Partisë Demokratike. “Para se të flasim për kundërshtarin, le të flasim për programin në radhë të parë. Kjo është shumë e rëndësishme që ta dini, se kjo është zgjedhja jonë. Ne zgjedhim programin tonë. Në çdo bisedë, ne kemi epiqendër programin. Secili nga ju punën duhet ta masë sa njerëz do të takojë ai dhe stafi i tij.”. Berisha njoftoi se fushata elektorale e opozitës do të hapet më 11 prill, në orën 19.00, në Tiranë, ndërsa iu kërkoi të gjithë drejtuesve politikë të qarqeve dhe krerëve të degëve, të cilët i mblodhi në selinë blu mbrëmjen e kësaj të marte, që të merren me organizimin. “Detyrën e parë keni pra organizimin. Organizimin sa më të sigurt. Trajnimet e të gjithë përfaqësuesve tanë në të gjitha nivelet e komisioneve të votimit janë të domosdoshme. Janë një rëndësie parësore, duhet të fillojnë menjëherë. Duhet të zgjidhen personat në kuptimin që mund të përmbushin më mirë këtë detyrë, por ata duan trajnim”. Më herët, në një takim me banorët e degës numër 9 në Tiranë, Berisha tha se programi i tij parashikon ulje të çmimit të energjisë dhe karburanteve, si dhe bonus për familjet me fëmijë. “Shqipëria energjinë pa asnjë lloj humbjeje mund t’ja shesë qytetarëve me 7 lekë. Ne do e ulim në 7 lekë kilovatin. Shqiptarët do blejnë naftën me ato çmime, plus minus 10% që e blejnë maqedonasit, kosovarët, malazezët, dhe absolutisht asnjë qindarkë më shumë. Familjet me fëmije, do kenë bonuse për fëmijët. Për fëmijë e parë 70 euro, për fëmijën e dytë 60 euro, fëmija i tretë do rritet tërësisht nga shteti, nga lindja gjer në moshën 23 vjeçare”.