Anëtarët e ekstremit të djathtë të koalicionit të Netanyahut, përfshirë ministrin izraelit të sigurisë Itamar Ben-Gvir, kanë kërcënuar se do të japin dorëheqjen nga qeveria nëse ratifikohet marrëveshja këtë të premte. Kjo është arsyeja se përse Netanyahu shtyu edhe 24 orë ratifikimin e paktit me Hamasin për t’i dhënë fund luftës. Sipas mediave ndërkombëtare ujdia e armëpushimit ka ende gjasa të votohet nga një shumicë në kabinetin e sigurisë dhe në qeverinë izraelite, por kryeministri ka mbetur i pambrojtur. Të gjithë sytë janë tani tek partia tjetër e ekstremit të djathtë në qeverinë e Netanyahut, partia sioniste fetare, e cila udhëhiqet nga ministri i Financave Bezalel Smotrich. Ben-Gvir i kërkoi atij të bashkohej me të për t’u larguar nga qeveria. Në Izrael edhe opozita ka shprehur mbështetje për armëpushimin, por me krisjet e forta brenda kabinetit të Netanyahut, qeveria e tij rrezikon të bëhet jashtëzakonisht e brishtë dhe mund të bjerë në çdo moment. Zyrtarët amerikanë përsërisin se marrëveshja do të nisë zbatimin më 19 janar. Ishte sekretari amerikan i shtetit në largim, Antony Blinken ai që deklaroi sërish të mërkurën se përtej pengesave të paparashikuara, kishte besim se luftimet do të ndalen të dielën.