Një ngjarje e rëndë kriminale u zbulua pas tre javë hetimesh nga Policia e Durrësit, e cila arriti të zbardhë vrasjen brenda familjes. Ngjarja, që tronditi opinionin publik, nisi kur 2 ditë pas krimit, më 15 gusht, një 30-vjeçar raportoi zhdukjen e babait të tij. Esmerald Balla, 30 vjeç, nga fshati Shënavlash, kallëzoi në polici më 15 gusht se i ati, Enver Balla, 62 vjeç, ishte larguar nga banesa me një grua të panjohur dhe se që nga ai moment nuk kishte mundur të lidhej më me të. Esmerald Balla shprehu dyshime se kjo grua mund ta kishte vrarë babanë e tij, pasi ai kishte marrë dhe kursimet e familjes që do të investoheshin në shtëpinë që po ndërtonin për familjen e Esmeraldit që pret fëmijën e tretë. Familjarë dhe të afërm janë tronditur nga ky krim i rëndë, vrasja dhe fshehja e kufomës.