Një incident zgjedhor është shënuar në Mirditë, ku policia ka arrestuar bashkëshortin e kandidates për deputete të Partisë Demokratike, Elda Hoti, pasi është përplasur fizikisht me disa shtetas, që sipas tij, po shpërndanin para në këmbim të votave në Rrëshen. Në pranga ka rënë 45-vjeçari Ladi Ndoja, i cili akuzohet për veprat penale “Pengimi i qarkullimit të mjeteve të transportit”, “Drejtimi i automjeteve në mënyrë të parregullt”, “Vetëgjyqësia” dhe “Kanosja apo dhunimi ndaj pjesëmarrësve në zgjedhje”, si dhe mbështetësi i tij, 25-vjeçari Amarildo Jushi. Uniformat blu të Mirditës sqarojnë se arrestimi tyre është bërë mbrëmjen e kaluar, pasi këta shtetas me dy automjetet e tyre kanë ndjekur dhe i kanë bllokuar rrugën automjetit që drejtohej nga shtetasi Renuar Kalaj, drejtor i Zyrës Arsimore, dhe që shoqërohej nga Aleksandër Doda, drejtor i Shëndetit Publik, të dy banues në Rrëshen, me pretendimin se këta shtetas po kryenin veprimtarinë e blerjes së votave. Mësohet se dy drejtorët po ndiqnin një person tjetër, shtetasin Akil Ndoja, mbështetës i Partisë Demokratike.