Dy vajza 19 dhe 17 vjeçare fshiheshin pas faqes së instagramit që u kthye në makth për të rinjtë e Korçës pasi postonin foto, video intime dhe statuse denigruese dhe bullizuese për bashkëmoshatarët e tyre. Të rejat nga Korça përfunduan në pranga pasi u identifikuan falë operacionit “CyberShield” ku u angazhuan strukturat ligjzbatuese për Hetimin e Krimit Kibernetik, policisë dhe prokurorisë. Skandali u zbulua pas denoncimit të bërë nga një oficere e sigurisë në shkolla ndërkohë që të rinjtë e denigruar dhe bullizuar bënë thirrje pubike që personat përgjegjës të viheshin para përgjegjësisë. Në njoftimin zyrtar të policisë bëhet me dije se pas hetimit intensiv, u identifikuan dhe ndaluan dy shtetaset, për veprën penale “Pornografia me të mitur”, të cilat ishin të përfshira në këtë veprimtari kriminale. Por cili ishte roli i tyre ?! P. M, 19 vjeçe, banuese në Korçë, ishte administratorja e profilit të krijuar në rrjetin social Instagram, ku publikoheshin materiale me përmbajtje bullizuese dhe denigruese. Ndërsa 17-vjeçarja tjetër, banuese në Korçë, ishte përgjegjëse për aplikacionin “Tellonym”, i lidhur me profilin e Instagramit. Ky aplikacion shfrytëzohej për të ruajtur anonimatin e kujtdo që dërgonte materiale për tu publikuar në faqe. Për 3 netë radhazi dhjetëra të rinj të moshës 14 vjeç u vunë në shënjestër të faqes që bullizonte, shpërndante foto dhe video dhe shkrime me përmbajtje të papërshtatshme në rrjetin social Instagram. Të rinjtë pohuan se kjo nuk ishte hera e parë që ndodhte pasi faqja ishte hapur prej 4 vitesh dhe bënte postime në mënyrë periodike ndërsa këtë herë ishin hedhur edhe materiale foto dhe video të vajzave të mitura çka e rëndoi më tej situatën duke ngritur alarmin për të identifikuar dhe kapur autoret e krimit të cilat tani do të përballen me drejtësinë.