Izraeli dhe Hamasi duket se po shkojnë drejt marrëveshjes së paqes, pasi të dyja vendet kanë pranuar planin e Presidentit amerikan, Donald Trump, për t’i dhënë fund luftës. Kryeministri izraelit, Benjamin Netanyahu, deklaroi se shpreson të mund të njoftojë lirimin e të gjithë pengjeve nga Gaza “në ditët e ardhshme”. Në një deklaratë të shkurtër, ai bëri të ditur se ka dërguar një delegacion në Egjipt “për të përcaktuar detajet teknike”, duke shtuar se “qëllimi ynë është përfundimi i negociatave brenda pak ditësh”. Netanyahu theksoi se Izraeli ka pranuar disa elementë të planit amerikan dhe se presioni i ushtruar ndaj Hamasit – si ushtarak ashtu edhe diplomatik – ka sjellë ndryshimin e qëndrimit të tij. “Kishte nga ata që mendonin se nuk do të arrinim lirimin e pengjeve pa një tërheqje të plotë. Por ju them: kjo është reale dhe me ndihmën e Zotit, do të ndodhë shumë shpejt”, tha Netanjahu. Sipas Netanyahut, negociatat mes Izraelit dhe Hamasit, që do të zhvillohen në mënyrë të tërthortë në Egjipt, do të kufizohen në pak ditë. “Shtetet e Bashkuara dhe Izraeli do t’i kufizojnë bisedimet në një periudhë të shkurtër. Më pas, Hamasi do të shpërbëhet – ushtarakisht ose politikisht”, deklaroi kryeministri izraelit. Netanyahu shtoi gjithashtu se shpreson që gjatë festës hebraike të Sukkot (6–12 tetor) të mund të njoftojë kthimin e të gjithë pengjeve. “Ushtria izraelite (IDF) do të qëndrojë në thellësi të Rripit të Gazës dhe në territoret që tashmë kontrollon”, theksoi ai.