Agjentë të Guardia Civil në Spanjë bastisën mëngjesin e sotëm selinë e Partisë Socialiste në pushtet të kryeministrit Pedro Sanchez, ku sekuestruan dokumente e informacione në kuadër të një hetimi për financime të paligjshme. Operacioni u zhvillua nga njësia e specializuar për krime ekonomike dhe po koordinohet nga gjyqtari i Audiencia Nacional, Ismael Moreno, shkruan Corriere della Sera. Burime pranë hetimit pohojnë se forcat e rendit janë duke kërkuar materiale që lidhen me pagesa cash të kryera nga partia në fjalë gjatë viteve 2017–2024 për të mbuluar shpenzimet e drejtuesve dhe anëtarëve të saj. Pagesa të tilla dyshohet të ketë përfituar ish-ministri i Transporteve, José Luis Ábalos, dhe këshilltari i tij Koldo García Izaguirre, të cilët aktualisht ndodhen në paraburgim dhe po gjykohen në kuadër të hetimeve lidhur me ryshfete të dyshuara për furnizimet me materiale sanitare gjatë pandemisë së COVID-19, të cilat mund të përbëjnë edhe veprën penale të pastrimit të parave. Bastisja vjen vetëm pak ditë pas dërgimit për gjykim të ish-kryeministrit spanjoll José Luis Rodríguez Zapatero në çështjen “Plus Ultra”. Në kasafortën e zyrës së këtij të fundit në Madrid u gjetën bizhuteri luksoze me një vlerë të përllogaritur nga 2 deri në 3 milionë euro. Vetë Sanchez, që gjatë kësaj kohe ndodhej në Romë për një takim me Papa Leonin e XIV, i ka dalë në mbrojtje Zapateros. Ky i fundit dyshohet se ka drejtuar një rrjet që shtrihej nga Spanja në Venezuelë dhe deri në Kinë, duke përfituar në mënyrë të paligjshme 2.6 milionë euro në pesë vite, por sekretarja e tij insiston se një pjesë e bizhuterive ishin trashëgimi familjare ose dhurata të marra gjatë udhëtimeve.