Tensionet e ditëve të fundit në veri të kosovës kanë bërë që policia të rrisë prezencën në 4 komuna. Mbrëmjen e kësaj të enjteje në Lagjen e Boshnjakëve në Mitrovicë të Veriut u vu re direkt një prezencë e shtuar e forcave të policisë. Më 6 dhe 7 dhjetor, në veri të Kosovës ka pasur incidente me armë zjarri dhe me granata. Të martën, autoritetet bën të ditur se zyrat e komisioneve komunale zgjedhore u dëmtuan nga “mjete të rrezikshme”, nga grupe dhe persona “të maskuar”. Incidentet ndodhën teksa policia po përcillte zyrtarët zgjedhorë për në zyrat e tyre në Mitrovicë të Veriut dhe në Zubin Potok, pasi autoritetet zgjedhore po vazhdojnë përgatitjet për zgjedhjet për kryetarë komune në veri të Kosovës, të caktuara për 18 dhjetor. Duke parë këtë situatë, shba-të kanë bërë thirrje që zgjedhjet të shtyhen. Këshilltari i Departamentit amerikan të Shtetit, Derek Chollet, i tha Zërit të Amerikës se pikërisht për këtë çështje do të diskutojë me udhëheqësit e Kosovës gjatë vizitës së tij në Prishtinë javën që vjen.