Policia e Vlorës zbardhi detaje të reja lidhur me ngjarjen e rëndë të regjistruar mesditën e të enjtes në Radhimë, ku dy biznesmenët Luan Muça dhe Vasil Bedinaj u përfshinë në një konflikt të armatosur, së bashku me shoqëruesit e tyre. Përplasja mes dy biznesmenëve ndodhi për një pronë në Palasë, ndërsa policia njoftoi se për ngjarjen ka arrestuar biznesmenin 55-vjeçar Luan Muça dhe shoqëruesit e tij, vëllezërit Klaudio dhe Madrit Lleshaj, si dhe shtetasit Angjelo Breshani e Blerim Heta, ndërsa janë shpallur në kërkim 6 shtetas të tjerë të përfshirë në konflikt. Pas ngjarjes, blutë e Vlorës theksojnë se biznesmeni Muça dhe shoqëruesit e tij janë larguar me një mjet fuoristradë tip “Range Rover”, me ngjyrë të zezë, që nuk i është bindur urdhrit për të ndaluar në Rrethin e Alikokës, duke vijuar në drejtim të fshatit Peshkëpi, ku makina ka dalë nga rruga, duke goditur barrierat mbrojtëse të saj. Për pasojë, është plagosur Luan Muça, që drejtonte mjetin, dhe Madrit Lleshaj, të cilët u transportuan në spital për ndihmë mjekësore. Gjatë kontrollit të automjetit, shërbimet e Policisë gjetën dhe sekuestruan, në cilësinë e provës materiale, një armë zjarri, pistoletë, së bashku me një krehër me 16 fishekë luftarakë.