Një hotel, sipërfaqe të konsiderueshme trualli, apartamente, automjete dhe disa biznese në pronësi të Edri Buliçka dhe familjarëve të tij që pretendohet se ishin siguruar me të ardhura nga puna si kamerier në qytetin e Pogradecit janë vendosur në sekuestro me kërkesë të prokurorisë së Korçës. Pas një hetimi 3 vjeçar prokuroria e Korçës ka arritur në përfundimin se pasuritë e luajtshme dhe të paluajtshme janë krijuar nga të ardhurat që Edri Buliçka ka siguruar përmes trafikut të drogës në Itali dhe Spanjë për një periudhë disavjeçare. Ndërsa është përpjekur të justifikojë pasurinë me të ardhura nga puna si kamarier, çka gjatë hetimeve ka rezultuar një punësim fiktiv, prokuroria e Korçës ka bërë me dije se Buliçka ndër vite ka kryer transaksione bankare në vlera të konsiderueshme në lek dhe valutë të huaj e më pas ka investuar në biznese, prona dhe asete të tjera një pjesë të të cilave i ka regjistruar në emrin e tij ndërsa të tjera në emër të familjarëve. Sipas të dhënave të verifikuara në Qendrën Kombëtare të Biznesit Buliçka dhe familjarët e tij kanë rezultuar pronarë të bizneseve që lidhen me shitblerjen apo servisin e automjeteve, ndërsa në muajin maj të këtij viti në Pogradec është regjistruar hotel Rich, ku administratore figuron nëna e tij Edlira Buliçka e cila Po ashtu gjatë hetimeve të prokurorisë rezulton të ketë një biznes shitje online të regjistruar prej vitit 2021 që ishte adresa e shtëpisë. Pas hetimit prokuroria e Korçës ka kërkuar sekuestrimin e Hotel Rich, një trualli prej 965m2, një tjetër trualli dhe dy apartamenteve si dhe vendosjen e masës së sekuestros preventive për 3 biznese dhe 6 automjete.