Kryeministri izraelit, Benjamin Netanyahu vendosi të shpërndajë kabinetin e tij të luftës me gjashtë anëtarë, vendim ky që merret pas dorëheqjes së gjeneralit Benny Gantz. Gantz iu bashkua qeverisë së unitetit të kryeministrit Netanyahu në tetor, në fillim të luftës dhe ishte ai që insistoi në krijimin e këtij kabineti. Në mungesë të tij, Netanyahu zgjodhi ta shpërndajë të gjithë grupin. Kryeministri izraelit tani do t’i duhet të konsultohet për luftën në Gazë me një grup të vogël ministrash, përfshirë ministrin e Mbrojtjes, Yoav Gallant dhe ministrin për Çështje Strategjike, Ron Dermer, që ka qenë në kabinetin e luftës. Ai ishte përballur me kërkesa të shumta të partnerëve nacionalistë-fetarë të koalicionit të tij, përfshirë prej ministrit të Financave, Bezalel Smotric dhe ministrit për Siguri Kombëtare, Itamar Ben-Gvir, që të përfshihen në kabinetin e luftës, por një hap i tillë është konsideruar si shtysë për rritje të tensioneve me partnerët ndërkombëtarë, përfshirë Shtetet e Bashkuara. Të dielën, ushtria izraelite njoftoi se do të fillonte një "pauzë taktike" 11-orëshe të bombardimeve të saj ndaj militantëve të Hamasit në Gazën jugore, për të lejuar dërgimin e ndihmave humanitare për palestinezët e uritur dhe sot, duket se pauza ka vazhduar, pavarësisht disa luftimeve sporadike, sipas agjenicë së lajmeve France-Presse. Izraeli thotë se pauza në ofensivën e tij në Gazën jugore do të vazhdojë në të ardhmen e afërt dhe do të lejojë kamionët e ndihmave të arrijnë në vendkalimin Kerem Shalom të kontrolluar nga Izraeli, hyrja kryesore për ndihmat. Më pas kamionët mund të udhëtojnë në mënyrë të sigurt në një autostradë aty pranë për të shpërndarë ushqime dhe furnizime mjekësore në pjesë të tjera të Gazës.